絕密未曝光片段

我咪同你哋講過，呢個專頁係2014年7月3日面世，而正式拍煮食片之前，我日日都响度練對鏡頭邊講邊煮，就鏡頭搓麵粉嘅手勢之類，岑晚我搵返以前練習啲片呀！

果時，我會等鄉里放工，然後我哋兩公婆就响度揣摩，佢學set燈、揸機，我學就位、講嘢。我從來無諗過做幕前工作，連妝都無化亦唔想化，今日我對住鏡頭做到、講到、清楚解釋到，我係有苦練過。所以宜家見啲人口衰，唔理一切，總之覺得企响鏡頭面前嘅人就等同箭靶，我都覺得好唔公平。我並唔係好似明星廚咁有幾十人幫手，除咗she.com個專欄，其他都係我打電話去自薦得返嚟，試過打去某個傳媒仲俾人用粗口問候😅但寫愛情稿啲人講啲咩我又無乜反應，因為我坐响度練文筆，唔會練到手痛、腳趾發炎、腰痛。有時我都好想問下啲人，你憑咩咁講我呢？如果你明知無錢，請問你又做唔做到我做既野？不過，呢啲人理嚟無謂，我哋開心啲睇下以前既靈山 :D

by the way，點解我要放散把頭髮，就係因為試片時，發覺個胸太大，我個減肥方法係唔會減到胸……為咗啲片老少咸宜，例如老婆放心俾老公阿仔睇，婆婆睇到唔會大叫「啋！！」同埋自己個樣睇落去成熟啲 (紮起太過學生feel喇！但我又唔識set頭) 於是我同鄉里都覺得，應該將頭髮放落嚟。後來我直頭努力減胸，宜家總算細咗少少😂

---